CRTICE IZ KURILOVEČKOG NOGOMETNOG ŽIVOTA

​

I bilo je vu tem tjednu, kaj ni niš novoga, čudaj utakmice i čudaj golov, bilo je bogme više nogometne tuge neg radosti, a bilo je i kojekakve događajov, male i velike, mile i nemile….

 

Seriju tekme otprle su „dvojke“ pionirov već v tork popoldan, pri čem su mlađi izborili zasluženi remi kontra vršnjakov ze Zeline (2:2), a stariji možda i nezasluženo zgubili od istoga protivnika z tesne 0:1. Udarni događaj sekak je bila tekma seniorov protiv drugoplaseranoga Dugoga Sela, teromu je zapraf kontra nas trebal samo jeden bod kak bi i teoretski potvrdilo osvajanje drugoga mesta, a z tem i plasman v viši rang natjecanja. Nogometni dobro upućeni kibici i kuloari nudili su priču kak je Dugom Selu taj bod prevažen i zbog razloga kak bi sledeću tekmu doma, kontra Karlovca, odigrali z mejne napora, želje i, ne daj, Bože, kakvoga imperativa. Da vu te priče ima „i dima i vatre“ bilo je jasno već posle petnaest uvodne minute i pomalo čudnoga i nerazumnoga fučkajna glavnoga suca. Ime i prezime mu ne bi spomenul ni napisal da mi baš negdo za s'ako slovo istoga da 5 hilada eura! Moram priznati da v celem svojem nogometnom veku i trajanju nis zestal ni upoznal suca teri više zaslužuje epitet „debelokošca“ od djelitelja „pravde“ te srede. Čovek se kreće terenom samo kuliko to nužna potreba zahteva, fučka kratko, tiho i naoko nezaintereserano, a pri s'emu tomu s'ako malo iritantno z kažiprstom briše „skupi“ znoj z čela. Baš ga je tak obrisal i kad je dosudil penal za Dugo Selo, teromu su se čak i navijači z toga gradića selskoga imena – grohotom nasmejali. Ja sem, razme se, ponorel po do zna teri put v ove sezone i oštre strelice špota uputil i prema gosponu Mihalju teri je mirno sedel na klupske terase i ispijal svoju cugu. Imal sem dojam da mi „neverbalni govor“ negvoga tela i pogled istovremeno poručuju: „Jebi ga, stari, tak to mora biti…“. Pak onda tak i nek bu, na diku i slavu svem onem akterom teri takve nogometne pute traseraju i pri tem od sucov i delegatov svesno i uporno delaju „norce i bedake“. I s'i oni skupa s'e to zamotaju v celu balu celofana, zažmijeju na je'no i drugo oko, vuva pokriju z rukami, a jedini  „Pedro koji visi“ ispadamu zapraf s'i mi v klubu. I navek se i iznova pitam jel tomu zapraf ima kraja, pa celo se društvo, doduše negda mi se čini puževem korakom ipak kreće napred i na bole, samo nogomet nikak da se zvleče z „močvare i žabokrečine“. Pa kaj se v tem jebenom nogometu nigdar ne bu pojavil nikakov Matija Gubec…?! Matija de si, de te vrag drži, dojdi k nam da zapreš gubec s'em tem zaslužnem „dobrotovorom“ z močvare….A pro po, i Beli Domitrović mi je v spominku na terase spomenul da je upraf zbog takve i slične sucov i dobrotvorov još prije deset let za navek mahnul na zbogom „najlepše sporedne stvari na svetu“ – nogometu.

Mi smu zapraf odigrali jednu baš solidnu tekmu v tere su i oni igrači z mejne minutaže opravdali trenerovo povjerenje, mogli smu pretpostavlam i više od konačne 1:1 (strijelac Alili), da su nam dozvolili…Šećer, naravno, za kraj, ujedno i kakti dokaz da nam fakat nisu dozvolili: v jedne sasma normalne i čak mirne tekme, mi smu „nagrađeni“ z 8 (osem) žute kartonov, a gosti teri su morali do boda pod s'aku cenu – z jednem!? Z tem da je onaj naš 9. (deveti) i drugi Mije bil i isključujući pak smu se do kraja patili z deset igračov. Patili, ali i zdržali pak dečkima skidam i kapu i škrlak..

E, sad, da bute do kraja vpučeni v daljnji tek događaja, sloboden sem informerati vas kak je Dugo Selo v subotu doma, kontra Karlovca – fest najeb…Sudil im je prvoligaški sudec i već v 5. minute isključil igrača teri je naredil penal, razme se, za „drage goste“. Do kraja tekme Dugoselci su fasovali 5 (pet) komadov i na lepi se način oprostili od verne navijačov. Tak lepi da je posle tekme bilo vike, galame i svađe na s'e strane, nastradala su i jedna vrata, a navodno je i trener, šokeran ovakvem scenarijem, odlučil klupu prepustiti nekomu drugomu…Tak da bi se, po Bogu i pravice, dalo zaključiti kak je, zapraf, v jamu tera je kopana za nas, opal negdo drugi, teri je takaj pri kopajnu imal lopatu v ruke. I nek je, nemam ama baš ništa protiv!!!

Vu tu istu subotu gledel sem doma prvo poluvreme tekme mlađe pionirov kontra Bistre i ostal oduševljen kak su klinci igrali i do vodstva od 2:0 na brzaka stigli. Drugo nis mogel gledeti jerbo smu morali na put v Trešnjevku, ali sem nazval Becu da čujem konačni pionirski rezultat i ostal šokeran posle vesti da su pionirčeki na kraju zgubili z 2:3!? Zgleda da je ovaj šok ostavil traga i na starije pionire pak su i oni zgubili z najgorem rezultatom – 0:1. Kaj se naše mladeži tiče, spomenul bum i da su „trojke“ prstićov i limačov v Buševec išle samo na izlet, prvi su zgubili 7:3, a drugi 5:2. „Dvojka“ prstićov je „nastradala“ v Turopolju 7:0, a ona limačka je zabilježila valda najveću pobedu – 0:17!!! Zapažen je bil nastup kadeta v Sesvetskom Kraljevcu vuz remi 1:1, a još zapaženiji juniora vuz pobedu 1:3. Bravo za dečke, bravo za Ninu i Rašu…..

Seniori su v trešnjevačke Grabe, v lepe purgerske i opuštene atmosfere, već do kraja polčasa  „popušili“ dva komade, prvi posle čistoga i podrazumeva se nedosuđenoga faula na Aliliju, a drugi posle još čišćega i takaj nedosuđenoga ofsajda iliti zaleđa. A znate do je sudil? Za neverovati, isti onaj sudec kaj nam je doma sudil i v sredu kontra Dugoga Sela i teromu sem prišil epitet „debelokošca“. Razme se da, čem se na terenu pojavi takva persona, spoznaš da nimaš kaj iskati, to više kaj je Trešnjevke pobeda bila nužna kak bi osigurala opstanek v lige. Jebeš tekmu v tere si unapred osuđen na odstrel, baš kak glineni golub negda pri Želku Vađiću. Razmem da je igračima teško igrati v takvemi okolnosti i scenariji pak im ipak odajem priznanje kaj su s'e to stoički podnesli, bez preveć bunta i norenja i vuz, verovali ili ne, samo tri žute kartone. I pri dodele s'akoga gospon sudec je z kažiprstom brisal „skupoceni“ znoj z čela….Domaćinu fakat nimamu kaj zameriti, nihova pobeda je mejne čista, ali više zaslužena jer su v tekmu, logično, zašli z više vole i žara. E, baš nedostatek te vole i žara, bez obzira na spomenute okolnosti, ipak zameram i „mećem pod nos“ nekim našim dečkima, a bogme ni dr. Matu ne bum pošparal zbog dva zicera tera on jednostavno mora zabiti. I znam da mu zbog toga ni s'ejeno, znam da je Mata još navek doktor nogometa, a gospon čovek od navek….pak znam da zaj'nega ne vredi ona „…selo priča Matu nebriga…“. Gospodine, glavu gore i „u boj, u boj…“ i u novoj sezoni…..zajedno s dečkima koji su te spremni i voljni slijediti….

Razme se da posle tekme nismu baš bili oduševljeni z spomenutem „žarom“ pojedincov, baš kak ni z fulanemi ziceri, a završno ni z najtežem porazom v cele sezone i to od momčadi tera nikak ni bola od naše, eventualno nam je al' pari. A to nas je zapraf pratilo cele sezone jerbo smu većinu vrlo dobre partije i (pre)retke pobede ostvarili protiv znatno više plaserane i kvalitetnije momčadi, a od one ispod nas nafajtali smu tek Petrinjce doma z sedem lake komadov. Ali, ima med nami kibici teri smu na s'ake tekme i jeden teri je bil posebno razočaran, pogođen i frustreran toga lepoga subotnjega jutra i dopolneva. Reč je inače o djelatne osobe našega kluba (podaci poznati i dostupni v redakcije), osobe tera je tam negde od hiladudevetsto i….pak s'e do denes zrasla i prerasla v daleko najvećega kritičara „s'ega i sečega“, tera je vu tem razdoblju hitila daleko najviše špota i otrovne strelice na razno razne adrese i situacije…osoba tera mi je z dana v dan s'e više spodobna na onoga Mrguda ze Štrumfove momčadi. Dakle, gard te osobe si, pretpostavlam, morete predočiti, a baš z tem gardom se čovek odlučil zapodjenuti „male podnevne spominke“, ni mejne ni više neg z trenerom i to s'ega pet minut posle završetka tekme. Pak on lepo trenera pita: „a zakaj ni Mata….a kak Selman ne mre….a kaj Grdi glumi tam….a kaj ovo, a kaj ono, a zakaj, a pokaj…“!? I razme se da je trener još vruć od utakmice i nesređene dojmov, a v s'emu tomu k'o osoba tere je posle poraza sigurno i daleko najteže, „načisto popizdio“ (bez obzira kaj moja malenkost to more razmeti, ali ne i podržati ili odobriti). Besen kak ris odjuril je prema svlačionice, putem hitil v zid vuru tera se raspala v hiladu komadi, a potem si sel i zaprl se v auto jerbo se jedino v autu mogel osećati k'o Pale…

To je, also bite, bil taj nemili događaj teroga sem uvodno najavil, a posle teroga smu precednik, ja i dotična djelatna osoba seli v auto i imali „minutu šutnje“ skroz do povratka na našu klupsku terasu. Tu su nas srećum još navek čekali Zdenka, Ćiro i Beco, pak smu ekspresno naručili dve runde kak bi sprali gorčinu vis a vis „trešnjevačkoga incidenta“. Razme se da smu s'emu tomu nastojali dati i jeden pomalo leži pa i humorističniji ton, pri čem je Ćiro dal svoj sud i primedbu: „Jebate, ti si štel na silu da Senadu kupimu novu „spametnu“ vuru za rođendan, sam Bog da ju nismu kupili jerbo bi ju denes potrl. Fakat je s'ako zlo za jeno dobro…“. Onda se mudrac setil i nekaj novoga i dodal malo soli na ranu: “Kaj nisi rekel da je i dotičnomu (čitaj: djelatne osobe) drugi tjeden rođendan?! E, onda bumu lepo sad n'emu kupili tu vuru, a on ju nek' velikodušno da Senadu, vuz lepe i prigodne reči – „ispričavam se, na ti vuru…najeć je se….“. I dok je dotični vu to vreme nekaj čistil i pehal po svlačionica, terasa se „kupala“ v smehu…Isti se pojačal kad sem na precednikovo pitajne – kaj bumo „dotičnomu“ kupili za rođendan, bez pardona i puno razmišlanja odgovoril: „Brnjicu“! „A taj film ne buš gledel, vu to se ja ne bi štel mešati, to mu samo ti moreš kupiti i dati“ – bila je brzopotezna precednikova replika.

I bi, kupil bi ja to svemu kumu i znam da se on na me ne bi zbog poradi toga srdil jer bi razmel tera se poruka v tem daru skriva. Baš kak i ja razmem negvu beskrajnu ljubav i privrženost i spram Udarnika i spram Kurilovca, negvu beskrajnu volu i žrtvu, borbu za pravdum i pravicum. S'e to razmem, cenim i poštujem, baš kak i s'i ljudi u i oko kluba, jedino ne razmem kak moj kum nikak da spozna i svati da je Robin Hood bil samo jeden i da se posle n'ega drugi ni pojavil. Ili se možda varam….možda je baš tu, med nami….

Dragom kumu sve najbolje za rođendan, uz obilje zdravlja, toplih, mirnih i suzdržanih riječi, pogleda i reakcija te novih uspjeha u njegovim „udarničkim“ sabranim djelima, od srca želi kum, pjesmom: „Imam kuma što ga ni'ko nema“. Živeli!

Ajd bok….žurim se v ZOO dućan po….brnjicu, razme se!