CRTICE IZ KURILOVEČKOG NOGOMETNOG ŽIVOTA

Ovu sam povijesnu krilaticu legendarnoga doajena CRO novinarstva Mladena Delića, u naslovne forme napisal još tam krajem studenoga, posle zadnje domaće tekme kontra zagrebačke Trešnjevke.  Naslov je dugo stal gol i bos, bez ijedne rečenice ispod jerbo jednostavno nis smogel ni snage ni inspiracije, a ni prigodne reči i rečenice z teremi bi probal sam sebe, a kam pak vama, objasniti kaj se to zdogađalo i zjebalo na kraju kurilovečke nogometne sumorne jeseni.

 

Bez teksta sem, also bite, ostal posle spomenute domaće tekme teru smo usprkos vodstva od 2:1 i igrača više već na početku drugoga polčasa, ipak, verovali ili ne, uspeli zgubiti i pri tem treći, „poražavajući“ gol popušiti v sudačke nadoknade (po do zna teri put te jeseni!?). Tres, tres, tresnula nas je Trešnjevka, ni kriva ni dužna, mesto da se v svoju Grabu vrnula z pet lagane komadov v mreže. I kaj posle s'ega toga moreš neg sam sebe pitati – ljudi moji, jel'  to moguće!?

Ali, uverenje da bumo za tjeden dan v Petrinje popravili ovaj neplanerani i pomalo sramotni kiks, nigdo mi ni mogel zeti. Pobegel sem tu subotu z kolinja na svojem gruntu i skupa z precednikom osvanul na tribine petrinjskoga stadiona teri se, baš kak i cela i još navek fest ranjena domaja nadaleko poznate Gavrilovićeve tirolke, kupala v mrzlom jesenskom pljusku. Vreme k'o stvoreno za sesti vuz toplu peć, za nogomet ni pod razno, iako je sam teren čak bil podnošliv. Uvodne minute mam su otkrile da je kontra nas domaćin i protivnik daleko najskromnije mogućnosti od s'e dosadašnje. Potvrdil nam je to i njihov trener Ivica Vidović Pido izjavom da se jedva pet, šest igrača uspelo vu tem tjednu okupiti dva put na treningu…Ali, kaj nam je vredela ta naša apsolutna dominacija kad si je naš nesretni golman Franko doslovno sam zabil dva gola!? Domaćini nisu puknuli po našem golu, a na semaforu je pisalo 2:0 v njihovu korist!? Na kraju devedesete bilo je 4:1 za Petrinjce, dakle, ta daleko najskromnija momčad uspela nas je rasturiti kak to ni uspel ni lider Karlovac, a ni bilo tera druga momčad v lige!? I precednik i ja smrzli smu se k'o pi…, domom smu išli kak da nam je pura kruf odnesla, a celem putem v zraku je titralo samo je'no pitajne – ljudi moji, jel' to moguće!?

Utjehu sem našel v velikomu kotlu punomu špeka teri me doma čekal, spremen da ga kuvača v moje ruka pretvori v slasne čvarke. Ali, ni te zlatno smeđe svinske delicije, ni Bašine kobase, salame i prezvušti nisu uspeli kompenzerati petrinjsku tugu doživlenu toga 3. prosinca…

 

Tak su naši dečki v zajdna dva kola uspeli dati „dreku šupanec“ i to v negve jušnije verzije, baš kad smu se spremali je'nu solidnu godinu proslaviti i „zalejati“ na naše Kurilovečke noći, a i dušu si malo razgaliti v restoranu baš za našu dušu. Sreća i Bog da život negda posegne za vagum čiji jezičec prevlada v korist dobra, a baš v taj petek lepo je i visoko poskočil na stranu dobra zafaljujuć Dalićeve familly tera je mudro nadigrala i posle penalov a'la Livaković domom otpravila brazilske caraoce, bez ikakve sumnje autore i prezentatore najlepšega nogometa na prvenstvu. I dok smu zdušno v velike sale okojskoga restorana popevali „Moju domovinu“, još navek nismo bili svesni da smu nadigrali i posrameli veliki Neymarov Brasil. Radosna, nasmejana i raspevana lica još su navek bila pod dojmom neverice – ljudi moji, jel' to moguće!?

Bogu fala je, i te kak je moguće, pak se cela ta noć pretvorila v je'nu veliku bajku, a onima koji su pobrali glavne nagrade na tombole (dva vikenda v Dubrovniku, zafaljujuć dubrovačkem pajdašom našega Števek Črepeka i vikend v izletištu v Lokvama, zafaljujuć pajdašu domarke Kate) bila je još bajkovitija.

Kad smu tjeden dan kešneje v tekme za treće mesto zmazali i taj strašni Maroko, životna je vaga bila sasma na strane dobra, a ponosno srce veće od Himalaje: mala Croatia pak je na tronu, drugo svetsko za redom! S'i šeiki celoga Katara i šire okolice to ne mreju kupiti ni platiti, to more samo ponizno, ali veliko hrvatsko srce!!! Kapa dole i dečkima i Daliću, v terem je od prvoga dana živela nada i vera da je s'e to i te kak – moguće!!!

I de ćeš lepše predigre i uvertire za najlepše i najdrakše blagdanske dane v terima mi katoliki slavimu rođenje maloga Isuseka, razme se, v toplom obiteljskom duhu i zajedništvu, okupleni oko bogatoga stola i nakinđanoga bora. Bor sem, onaj srebrni i pikavi, već zdavna zazlaminal i rezerveral pri Majetiću na vrtu i već v petek je bil nasajen i pripravlen za lifrajne v hižu. Na sam Bajdnak, teri je za me nekak posebni i uzvišeni svetek i teri mi „do neba“ ispuni i dušu i srce, najprije sem moral otijti po orade v Sokolovu ribarnicu na tržnice. Novi je to običaj v naše hiže teroga su uvela deca, pak se sad za bajdnu večeru mesto krvavice, vratine i francuske, konzumera ribica, blitva i maslinovo volje, a predi toga je dozvoljeno pojesti malo domaće paštete od kulena ili kriškicu, dve pršuta, pardon šujnke. Zato sem moral najprije domom donesti te ribetine tere je Danica već očistila i skrila pod pultom da ne moram dugo čekati. A doma je već bila i naša mlekarica Jasna z cekerom friškoga domaćega sira, vrjna i mleka. Pak je bil red da naše drage mlekarice zaželim sreten Božić i nazdravim z jenum rakijicum. Onda sem jen friški i mokri sirek dobrovolno otpelal k naše Zdenke na Bunu i lepo sem ga trampil za veliku škatulu cigaretlinov tere je zajdne dva dane uspela brižno i stručno nafrkati. Pak je bil red da je se zafalim i takaj zaželim sreten Božić, razme se, vuz čašicu francuskoga kojnaka (ah, kakva čast!) teroga Polona vadi z vitrine samo v retke prigode mojega navraćajna. Tak da me još čeka skoro trifrtal flaše ovoga francuskoga vraštva, z tem da se spomenuta količina vraća v vitrinu i prebacuje v Novo leto…

Onda sem se pak moral navrnuti k bratiću Spideru teri mi je, doduše z donešenoga materijala, skuval četri zdelice fine ladetine bez tere vu te svetke neću i ne mrem biti, nek se najde za s'aki slučaj…Bogme ni kratki boravak pri bratiću ni mogel prejti bez dve rakijice, pak kak si ne bi nazdravili, am bi to bi bil veliki greh na Bog Bajdnak…

I tak sem ja zbavil s'e svoje jutarne shopping i prateće obaveze pak sem sad mirne duše mogel otijti na mesto tradicionalnog bajdneg okuplajna moje pajdašov – k Rojcu. I tu sem si žmeknul jenu medicu, predi neg mi je stari sveznadar Rojc serveral zdelicu svojega oslića „a'la bakalar“, vrhunski pripravlenoga i fino zapaprenoga. Tak fino da se ne mreš zdočkati prve čaše gemišta da smiriš i gasiš ziriterani jezik i ždrelo…..i tak, razme se, v više i v puno navratov. Javiljak i društvo su već na veliko graturerali i popevali oko stolov, po času su dospeli i za naš pak je bil red da naručimu teru pesmu po svoje i naše želje. Mam sem na haramuniku zateknul onu, sad već pokojnu, novčanicu smeđe ili drap boje i naručil dve pesme. Prvu za pajdaša teri ni bil z nami, inače precednika jene znamenite stranke, dugoročnom i bezaferaškom vladajnu sklone i vučne – „Sve ću prodat sutra“, a drugu, z istočnoga folk područja (Tominu „Ponoć“) za nazočnoga mudrijaša Rojca. I s'i su redom popevali, osim – pogađate, Brace Rojca, teri ni znal tekst, a plus toga on ni pristalica te šrot glazbe, on više preferera Bacha i Drageca Diklića. Zato sem v čast negvomu profinjenomu glazbenomu ukusu, ali i svojemu prikrivenomu guštu, hitil jenu čašu, razme se, v kut i na sigurno, kaj je gazdu lokala ipak malo hitilo z kolotečine. Lepu i raspevanu bajdnu atmosferu pri Rojcu, moj pajdaš znamenitoga prezimena tero nosi i je'na riba, a imena kakvo pak ima jen cvet, odlučili smu se povleči i premeniti lokaciju. Završili smu pri prve gradske persone, mladom gradskom ocu, teri je doma v Gradiću, v miru svojega dvorišća, okretal odojka na ražnju. Lepi naši bosanski običaji i dragi ljudi kaj su je dopelali v naš kraj, pak da ni te običajov i toga dragoga naroda, Bog zna de bi moj pajdaš i ja toga časa završili. Ovak smu se još s'i skupa lepo podružili, popili po dve rakijice, čestitali si Božić i mahnuli na pozdrav.

I sam Bog da jesmu jerbo su se v daljine nazirali prvi tragi kmice, a zna se da se Božić v hižu nosi baš kad se prva kmica primle oko hiže. Uf, dohajbal sem domom baš v zajdni čas jerbo se čekala još samo moja visost da šenica i slamica završe pod stolom, črlene jabuke naj'nem i da vuz plamiček svete sveće krene molitva. Dej nam Bog picekov i racekov…. žira i Božega mira…iak mi se činilo da su i žena i deca v stajnu stanovitoga nemira. Nekak su me čudno promatrali i pogledavali, kak da mi oćeju reći i insinuerati da sem si malo popil, da sem malo pod gasom i zaziban. Kaj bi bil, kaj god, najte noreti…do, kaj ja…? Bez obzira na moju neuverlivu i tenku obranu i uzaludnu negaciju činjeničnog stajna, ipak je v zraku lebdelo neizrečeno, ali opiplivo ženino pitajne i sumnja: ljudi moji, je li to moguće!? Ni moje specifično stajne ni ženina sumnja nisu mogli zrušiti lepotu i blaženstvo bajdne obiteljske večeri pak smu se mi muški prijeli kinđajna bora, a ženske su v kujne zgotovlale večeru. Dobre dve vure smu se motali i muvali oko bora, s'e kak bi s'aka kuglica završila baš na svojem i najlepšem mestu, a sam Bog da zet ima skoro dva metre pak nam ni trebala lojtra kak bi nakinđali one najgorne grane i grančice. Blagoslovlenu i bogatu riblju večeru popratili smu z čašicum rakije, a ispratili z kupicum z Adžićeve bele butelje i radosno dočekali još jeden tak dragi Božić

Malo se toga da pariti z jutarnum božićnum kavicum i rakijicum, finum kulen paštetum na zlatnomu prepečencu, šniticum šujnkice… i kaj je daleko najvažnije – z dragum braćum na okupu. Sred te miline teru je pojačal prvi jutarnji čestitar, pajdaš Ćiro, osetil sem kak da me trese nekakva zimica…i tu je moje božićne radosti bil kraj. Celi sem Božić i naredne tri dane provel v krevetu, malo me tresla zimica, malo vrućina, malo sem cvokotal pod poplunom, malo se švical….., a bilo kakvom teku i apetitu ni traga ni glasa. Već na Štefajne mi se pridružila i žena teru je zdrmala jaka gripa, tak jaka da je pune četri dane jednostavno prespala. Ja sem pak te tri dan preživel na lupocetu i brufenu, vrućem čaju z limunum i medom i de terum aninum torticum. I kak se onda v neverice ne bi pital – ljudi moji, je li to moguće, jel se baš mene moralo dogoditi da sem te najdrakše i z beskrajnem nestrplejnem dočekivane svetke, prvi put v životu moral provesti – ispod popluna!?

I kaj bi ja, prosim vas lepo imal od toga Božića, po čemu bi ga pametil da si nis na Bajdnak malo popil i srcu i duše malo oduška i veselja dal i priskrbel?!

V nade da ste vi svoje blagdanske dane proveli v sasma drugem stajnu i ozračju neg je to bil slučaj z mojum malenkosti, s'e vas lepo pozdravlam i želim vam s'ako dobro, bolše i najbolše v Novem letu!!!