CRTICE IZ KURILOVEČKOG NOGOMETNOG ŽIVOTA

EVO NAS OPET, ZELENI „UDARNIČE“, U DVORE TVOJE S(E)VRAĆAMO MI, DA OPET ZRAKE DIŠEMO SVJEŽE I DA NAM PJESMA VESELA ZRI…

Ne znam ni sam otkud su mi na pamet opali ovi stihovi z pesmice (u originalu: evo nas opet, zeleni briježe…) teru smu nafčili i popevali još tam negde v četrtom razredu osmoletke. Nekak  mi se štimalo da imaju dost dodirne točke z situacijum upraf aktualnum za naš „najveći mali selski klub na svetu“.

Also bite, nogometaški odmor i „time out“ se bliže kraju, već v pondelek 18.7. kreću pripreme za novu sezonu. Razme se da bi i igrači i treneri šteli da ih dočeka „zeleni Udarnik“, drugim rečima, oporavleni i održavani zeleni tereni na teremi budu leže prolevali „krv, znoj i suze“ čez teške pripreme. Ni moći reći, Gedžo se odhrval onemi peklenemi vrućinami pak mu trava ni zgorela i fakat se za sad trsi da tereni budu „ajnc a“. Gedžo, nema predaje….

V svoje dvore se (svlačionice), dakle, vraćaju seniori i njihov stručni štab, Zdenka (Polona) v svoj mali caffe, a oporavleni Bašo, bez glake na jeziku i mrene na oku, v svoju oružarnicu. Uprava kluba je još navek v potrage za rešenjem z terem bi i njegvu životnu družicu Katu vezali i zaprli vu tu istu oružarnicu, po mogućnosti i po nezine velike želje – kak zaposlenicu kluba. Još navek živi nada da bu i ta potraga okončana z „happy endom“…To je, zapraf, i preduvjet da bi i igrači v Katinemi zbigecanemi svlačionicami, i prije i posle treninga, disali zrake svježe. A ak' su zrake svježe, podrazumeva se da se odma i leže diše…Ništa ja tu ne sugereram, ne daj Bože, samo velim ono kaj je….

E, sad, v kakvom budu sastavu igrači pristupili pripremama, još je navek prilična nepoznanica. Kak i s'ako leto, neki bi se šteli oprobati v višem rangu, neki bi se, baš kak i slavni Lessy, rada vrnuli domom, a v kurilovečko bi gnezdo trebale zleteti i neke nove laste iliti pojačanja. Kak je prelazni rok v punom zamahu, to ne bi štel coprati kaj se bu, a kaj ne bu dogodilo niti bi vas štel zamarati z imenima zvanima želja. Uostalom, naši lokalni portali to uredno prate i objavljuju pak verujem da ste i vi vpućeni kaj je v klubu po tem pitajnu novoga. Više reči o s'emu tomu mogel bum napisati tam negde iza Velike Gospe, kad bu igračka inventura pri kraju, a slika buduće momčadi puno jasneša. Normalno da se s'i skup nadamu kak bu ta slika življa i koloritnija, a nogometna družina momčadski potentnija i homogenija, kaj bi sekak trebala biti dodatna garancija za nove pobede i iskorake prama gore. A s'aka nova pobeda najlepši je razlog da nam v našemi „udarničkemi“ dvori vesela pesma i zri i vri, kaj više neg se ori baš kak se orila na nedavnom i sledom inih okolnosti pomalo povijesnom koncertu.

Za vašu informaciju, v prošli je pondelek održan plenum klubova naše lige na terem su, između ostaloga, zvlečeni parovi za novu sezonu. Naš delegat na plenumu, tajnik Beco, je imal zadaću izboriti se da prvi vikend 03.09. i onaj 17.09. nikak ne bumo domaćini, a posle bum objasnil zbog poradi čega. Sledom toga je ispalo da prvo kolo 27.08. igramu doma protiv HAŠK-a, drugo 03.09. idemu na lokalni derbi v Lukavec, treće smu, v sredu 07.09. domaćini još jenoga domaćega ogleda kontra obreškoga Dinama, a mam v nedelu 10.09. pak domaćini kontra Trnja. Vikend 17.09. idemu na ogled Vrapču pak se nadam da nigdo od nas posle tekme ne bu završil v tamošnje znamenite „žute hiže“….i tak dale, i tak dale.

E, sad, da pojasnim zakaj dve tekme za redom igramu doma i zakaj su prije spomenuti vikendi morali biti fraj. Also bite, 03.09. su tereni i prostori SRC-a Udarnik domaćini svetskoga prvenstva v natjecanju znamenite pasmine cuckof – „Doberman cupa“. O kakve je pasmine reč mam vam je jasno, a na prvenstvo dolaze najtrofejniji i najskupocjeniji predstavniki ove vrste z celoga sveta. Razme se, v pratnje svoje ništa mejne znamenite i „žmefke“ vlasnikof teri budu za lubav svoje mezimcof potegnuli tijam do maloga i dalekoga – Kurilovca. I neg budu, Bogu i njem fala na tomu, nek je bu samo čem više, i gazde i cuckof, a mi jem bumu dali s'e od sebe…i jesti i piti, i spati i senati, i tancati i uživati….razme se v iskrene nade i vere da toga vikenda nigdo i nigde nikoga ne bu – grizel!

Onaj pak vikend 17.09. naš su centar rezerverali dečki z benda „Zakon šutnje“ i to za svoj rođendanski nastup i kocert na kojem bi šteli dobrum svirkum počastiti s'e svoje fanove, ali i suradnike i prijatelje z bogate estradne karijere. Koncert bi pak trebali uveličati, tak se barem šuška, „Crvena jabuka“ ili Bebek…i de ćeš lepše prilike za s'e Goričane i goste za završni letni dernek.

A uvertira v s'e to bi trebal biti završni turnir malonogometne lige „Sjever“, teri je na rasporedu 13. kolovoza, vuz večernju veliku i pravu domaću zabavu kakvu su još i te kak v stajnu prirediti stari maheri z grupe „Sjaj“.

Oprobani i dobitni kurilovečki recept teri je mešavina dobroga nogometa i zabave nastavla se, eto, i v druge polovice leta. Ak bu i na frtal uspešan kak je bil onaj z prve polovice, točneše z meseca lipnja teroga su obiležil 11. Alpas cup i koncert Miroslava Ilića, eto ti novoga razloga za široki osmeh na licu s'akoga kurilovečkoga kibica, a nadasve gospona precednika.

A do tad lepo pozdravlam s'e naše klince, njihove mameke i tateke, nadam se da uživaju v kupajnu, vruće janjetine i mrzle pive….još teri denek, a onda veliki „come back“ v „udarničke“ dvore da opet „zrake dišemo svježe i da nam pjesma vesela zri“…. Baš se  veselim!!!!