CRTICE IZ KURILOVEČKOG NOGOMETNOG ŽIVOTA

​

 

Iako nas od službenog stupanja živopisne jeseni na kalendarsku scenu deli još desetak dana, ipak moremu reći da nam je majčica priroda već pomalo skrenula pažnju na nezin dolazak i polefko nas priprema na nezine čari, ali i na „prevrtlive čudi  i podvale“. Noći više nisu tak vruće da bi obluke širom rasprli, laganu plaftu zamenila je najprije dekica, a sad već bogme i poplun pod teroga se tak lepo zavleči. V jutro se v autu najprije poseže za brisačima, kak bi rastirali i obrisali rosu tera z debelemi kaplicami prekriva šajbe. Ali, kaj je najvažnije, jesen nas je, kak i s'ako leto, počastila z berbami pak moram priznati da me baš s'aka ta berba fest veseli: kak ona obirača na vrtu, tera je doduše s'e ređa jerbo smu vrte zapustili i napustili, s'e pod lažnum i alibi parolum „kak se to ne splati“, tak i ona v trsju tero se nekak odhrvalo preteranom sunčajnu  i suše i brente i lajte čist lepo napunilo z slatkemi belemi i črlenemi grozdi. Ipak, od s'e berbe na ovem turopolskom svetu, daleko najviše me veseli berba bodova na zelenom nogometnom terenu…

 

A ta je berba, Bogu fala, takaj dala prelepe plodove, bole reći bodove pak smu v prva četri kola od moguće dvanajst pobrali velike deset i pospravili je na tablicu Treće HNL Centar, čist dost za (ne)očekivano visoku drugu poziciju. Slatka je bila pobeda na domaće uvertire kontra navek neugodnoga HAŠK-a, još slajša jerbo je v sam smiraj tekme za 1:0 zabil naš, još navek junior Pušić. Na lokalni derbi v Lukavec otišli smu bez dr. Mate pa baš vu te činjenice naši kibici vide razlog da smu zeli „samo“ bod (0:0). Doduše, bili smu mi i bez Mate bliži punom plenu, ali ak' ne zabiješ gol ne mreš se istomu ni nadati. Doma smu kontra novakov v lige i susedov z Obreža zabili čak četri (Ćosić 2, Bakula, Crnov), ali ni to bilo baš tak lefko kak bi razvoj rezultata mogel sugererati (bilo je  je'nu dobu 4:0 za nas), kaj su gosti i potvrdili v same završnice i zabili nam dva komada za konačne 4:2. Inače, na tekme smu prvi put na golu videli iskusnoga golmana Franka Lalića, koji je angažeran doslovno „v pet do dvanaest“ zbog poradi Išekove teže povrede (lom rebra), teru si je priskrbel na prijatelske tekme kontra male i frčne Kinezov z nihove U-21 repke. Još teže je bilo prekčera kontra još jenoga novaka v lige, Save ze Samoborskoga Strmca, tera nam je očito bila prilična nepoznanica. I prilično je lepo ta Sva tekla v prvom poluvremenu tak da nismu uspeli nametnuti svoju igru, čak su nam i dodatno zabiberili i na polčas otišli z vodstvom od 1:0, z opravdano dosuđenoga penala. Razme se da je Senad već na poluvremenu vužgal „zvono za uzbunu“ pak su lagana „jezikova juvica“ i logične izmene v nastavku prilično okrenule situaciju na terenu. Sava se ipak morala malo glibše povleči v svoje korito pa je već v 52. minute „mali“ Pušić još jemput dokazal vrlinu teru v nogometnom žargonu zovemu „nos za gol“ i poravnal na 1:1. S'e više je bilo jasno da bi mi tu Savu ipak trebali preplivati, bez obzira kaj smu negde oko 86. minute oštećeni za nedosuđeni klasični penal. Pravda kak pravda, navek spora, ali i dostižna, nasmejala nam se na isteku zajdne minute sučeve nadoknade: Mata je izvan šesnaest potegnul jednu prizemnu, lopta je na putu prama golu okrznula nekoga v šume gostujuće igračov i prevarila „velikoga“ Đurđeka. Razme se, za neopisivu radost naše dečkov, olakšajne i široki osmeh na Senadovom, Dinkovom i Depinom licu. Odehnuti si je mogel i gospon precednik teri ni bil na tekme jerbo je na zasluženom godišnjem i skup ze svojum dragum gušta i „rit namaće“ negde na lepom, plavom Jadranu.

Z olakšajnem su si zdehnuli i dva starčeki (čiste preslike one z Vulice Sezam), Franc i Novak, teri su celu tekmu nekoga vraga jamrali, priguzali i živčano mahali. Francu ni bilo po vole kak naši dečki ne znaju hititi loptu z auta natrag v igru, naročito tam negde oko kornera, a Novaku baš niš ni bilo po vole pak je furt „lajal“, najprije na Senada, a onda i na mesec teri nikak da zajde van!? Franc si je utehu našel v komadu mešane pice, a Novak v velike i mrzle pivice tera ga obavezno natira na bespomoćno kihajne. Jenu sem se dobu zabrinl da bu oboril i svoj rekord postavlen negde prije dve lete kad je kihnul trinajst put za redom. Ali ni uspel, zaustavil se na jedanajstom uspešnom „aapppcciiiihhhaaa“ pokušaju….

Bilo kak bilo, drago nam je da smu otvaranje prvenstva i taj prvi mini ciklus odradili na opće zadovoljstvo, svesni da smu dve tekme za redom igrali doma i da oni malo trđi protviniki, z povećanemi apetiti, tek slijede. Ali, dojam je da je momčadski duh barem za level veći od prošlosezonskoga pak bumo i na derbi z Vrapčem (kad igraju prvi i drugi to je navek derbi) išli mirne duše i bez ikakvoga kompleksa pa kom obojci….

Zato smo i v nedelu do poldan, posle lakšeg treninga Senadove „lake konjice“, guštali na letne terase okupane v sunčeku. Razlog više za zadovoljstvo dali su nam Ninini kadeti koji su puno teže neg to rezultat govori (3:0) dobili vršnjake iz nekad slavnoga NK Zagreba. Priču su kroz vrlo dobru igru ponovili i Rašini juniori pa je to bil i šlag na lepi kurilovečki nogometni vikend. I tu je nogometne priče bil kraj s obzirom da su vlast na terase i oko nje potem preuzeli kurilovečki vatrogasci koji su se pripremali za popodnevnu proslavu svojega 110. rođendana, na koju su pozvali brojna vatrogasna društva i nadležne institucije. Koristim priliku da našem DVD-u Kurilovec i u ove prigode čestitam uistinu vredni i veliki jubilej i zaželim još puno, puno uspešne vatrogasne let, razme se, po mogućnosti z čem mejne intervencije i ognov!

Samo tjeden dan prije na terase i na celom igralištu su harali i gospodarili – cucki, i to ne bilo kakvi cucki neg dobermani i to ne samo domaći neg z čak 36 zemle z celoga sveta!? Nigdar v povesti na „Udarniku“ ni bilo tuliko pesov pak je bila opravdana Gedžina briga zbog tere me već pri prvom susretu mam pital: „Čuj, s'e je to v redu kaj se pesov tiče, nek se oni natječu i šepure, ali reći ti mene do bu za'jnemi pobral s'a ta silna dreka, jebate pa to je 400 cuckov i nek se s'aki oj'dne samo jemput na dan zmeće, si zračunaj…“?! Lepo sem čoveku dopovedal da su to ipak cucki z Europske unije i kulturnoga sveta, baš kak su i nihovi vlasniki pak držim da z nihovum kakicum i ne bu prevelike problemov. Tak je na kraju i bilo pak je zabrinuti Gedžo na kraju potrošil samo par lopate peska kak bi saneral i pokril ona mesta de su se ovi plemeniti cucki zmetali v malo mekšem i jušnijem sadržaju. Jest da je od nihovoga podizajna zajdne nog, iza teroga sledi obavezno cukajne, ostalo par žute flekov po terenu, ali ostala je bogme i tera tisućica kune i nekteri euro v blagajne. Moj Gedžo, bez muke nema nauke, a bogme bez cuckov ni penez….travica bu ionak brže došla k sebe. Eto, već je denes Božo dofural kamion kvarcnoga peska, a zutra sledi Dadino bušenje terena i rastepajne peska i trave po glavnom pa bu pak došlo do malo zraka i dobilo nužnu dozu površinske finoće i mekoće.  A kaj moremu, de je blaga tu je navek i kvara…

A za dodatno blago se bumo probali pobrinuti već ovu subotu, 17. rujna, kad je na programu velika proslava rođendana goričkoga benda „Zakon šutnje“, a v okviru iste i koncert „Crvene jabuke“. To bu ujedno i završni tulum kaj se priredbe na naše terase dotikavle pak se nadamu da bu puno sveta dobre vole došlo na isti kak bi mahnuli letu na pozdrav i poželeli dobrodošlicu jeseni. I da to ne bu noć „šutnje“ već noć radosti, pesme i plesa…Nadam se samo da nigdo ne bu skopal kakov podatek o tomu jel ta „Crvena jabuka“ negda svirala i popevala na rođendanu kakvoga Čaruge ili kakvoga omraženoga političara ili tajkuna, z ne daj, Bože, kontra ili krive strane. Jebi ga, z Žerum se nikad ne zna….

Za kraj još par rečenice o berbe, jesenske, razme se. V subotu jutro smu bili pri Ćire v trsju, tero je fakat lepo rodilo i to ne bilo kakvu sortu grozdja, neg onoga s'e ređega i legendarnoga – direktora ili tuduma. Črno je, k'o za vraga rodilo kak ni v zajdne deset let pak smu se je'nu dobu bojali da nam s'e to ne stalo v kace tere smu pripravili, ali smu ga ipak nekak natiskali. Baz obzira na rekordni prinos bele i črne slasne bobice, Ćiro je furt jamral, baš kak negda i Milka Plemekova i kaštigoval nas kak nam je preveć bobice pocurelo po trave, pak je to šteta i grehota, s'aka bobica je je'na kap vinčeka….Stari, jebi se ti i tvoje bobice pak nekaj moramu ostaviti i za rajske tičice, za vrapce, kose i škvorce. Ali, moram isto tak i nega i negvu Karmen pofaliti zbog lepoga i bogatoga fruštika teroga je pod krošnum velikoga rasta bil posebni gušt pojesti, posle friške šlivovice staroga Ćire. I obed doma je bil za s'aku pofalu, od reš pečenoga odojka, krumpera i bažul šalate, luka, paradajza pak s'e do čaše pive jerbo lajnskoga vina je pri Suše zdavna nestalo. Vino je pri obitelji Suša jednostavno zdavnma – presušilo….Na kraju smu s'e to silno grožđe pospravili i raporedili v velike kace v pevnice, a Ćirokiju sem svečano obećal da nikomu ne bum otkril negvu formulu za pripravlajne vina teroga nam bu do sredine studenoga podaril ovaj slatki moštek. Zato o cukoru i vode ne bum napisal ni je'nu jedinu reč, bez obzira kaj je hidrofor je'nu dobu nekak čudno cvilil, a mene je baš vu tu istu dobu nekak zgrabilo v križe od te jebene hamperov…. Joj, do se bu zdočkal vina i Martinja….

Moram na kraju pofaliti i svoju Baru (a most bi ona ono f rado zamenila za v, do zna?) tera je svoju jesensku berbu imala na naše gradske tržnice (paprika roga, paprika babaroga, patlidžan, cikla…), a s'e to se dva dane kuvalo, mešalo i pripravlalo v garaže i na dvorišću. Ajvar se lepo krčkal v rangleku, tu i tam špricnul i spekel onoga do se kuvače prijel, a Kata ne bi bila Kata kad završno ne bi nutre hitila još jen luti feferon. Najrajš bi je ga hitil….Bilo kak bilo dva dane dvorišće je smrdelo po octu i kiseline, ali je zato pevnica denes puna ajvara, kisele paprike i cikle. Eto, moj Gedžo, još jen dokaz da bez muke nema ni pevnice pune zdrave domaće zimnice….

Eto, zbog s'ega toga je jesen vesela v mojemu kraju, bez obzira kaj sem naslov, samo v kontra smeru, kral z Tomine pesme tera počinje z kiticum „Jesen je tužna u mome kraju“. Snoćka sem baš na Nove gledel film o negvomu životu pak me se film i sadržajno i scenski i igrano fest dojmil i držim ga nadprosečnim uradkom za balkanske prilike. Jebate, kaj sem se ja tuliko raspisal o tomu Tome, da ni i on negda popeval onomu noromu Draže pak bi opet mogli naje….

Prekidam isti čas….ajd bok, uživajte mi svi v vesele jeseni!!!