CRTICE IZ KURILOVEČKOG NOGOMETNOG ŽIVOTA

KAM JE NESTAL PRVOMAJSKI GRAH ILITI BAŽUL?

​

Vikend v terem je 1. maj – Praznik rada, bil glavna tema, baš i ni prešel v prevelikomu „praznovanju“, još mejne v neradu i zležavajnu. Na žalost, sam praznik padal je baš v nedelu tak da ni radnička klasa ni svekoliko pučanstvo nisu mogli osetiti nikakve posebne blagodati toga praznika.

Negda, za vreme druga Tita, taj bi se praznik mam pomeknul za jeden dan tak da bi i pondelek bil neradni, ali denes tomu više ni tak. Verovatno bi taj jeden dan predstavlal preveliki gubitek za našu zahuktalu i sveprisutnu proizvodnu i industrijsku ekspanziju…!? I do bi, prosim vas lepo, i kak nakoknadil s'e te silne zgublene vure na, recimo, takaj zahuktale obnove hiže i hižice na potresom devasteranim krajevima „prelepe naše“…? No, da vi ne bi slučajno pomislili kak ja tu nekaj petlam i mudrujem z političkemi primisli, kaj mi fakat ni niti na kraj pameti, a niti me zanima, idemu se mi lepo vrnuti v okvire našega, kurilovečkoga vikenda. 

Also bite, ne sećam se kad je petek popoldan i predvečer bil skromneši v „klupskim dvorima“, nigdar mejne klincov niti roditelov. Naime, većina klincov taj vikend ni imala tekme, bili su, sledom razne okolnosti slobodni pak su je treneri poštedeli treninga i nagradili, i njih i roditelje, z produženim vikendom. Tek su se dva stola uspela napuniti z kandidatima za belu….Navodno su za onem roditelskem Silvio i Premec „zmazali“ Šolića i Šebeka, kaj je bil revaš za prethodnih dana pretrplene boli. Mi smu se pak jedva skupili i da ni naišel Čombe bogme ne bi imali konsenzusa. Ovak smu ipak hitili par partije, pri čemu smu Senad i ja bili raspoloženiji za igru od Ćire i Čombeja, kaj i sam rezultat 4:2 zorno potvrđuje.

Od nekud su se dotepli naši dežurni „masterchefi“ Robi i Fila i javili senzacionalnu vest: naši su veterani pobedili v Novom Čiću z 1:0!!! Eto, čuda se ipak događaju…..Kad već spominjem kulinarstvo, verujem kak ste primetili da naša pečenjara dela punum parum, pak vam budu gospon Šokić i već spomenuti Ćombe, rado spekli odojka ili jajnca ili s'e ono kaj si poželite kakti ispod peke.

Subota je pokazala i dokazala da taj vikend ne bu prešel v plandovajnu i neradu. Ćiro se zbrdil da bi bilo vreme da pokosimu travu v negvem, pardon tastovom trsju v Gudcima pak bu, eto, on skupil ekipu da taj posel na brzinu odelamu v subotu, čem prije i čem raneše. Ali, skuplajne se nekak mam v začetku zakompliceralo: znali smu da Bašo ima posla prek glave na Udarniku, ali nismu znali da budu neki kandidati za košnju iznenada i „prek veze“ dobili koronu i zaprli se v hižu, dok su neki pak neplanerano morali decu doma čuvati….I tak, s'e u s'emu, spala kniga na tri slova: Ćiro, Marko i ja pičimo oko devete vure prema Gudcima i skrećemu v vulicu v tere je trsje, a tera se zove Koloseče. Zanimlivo ime, mora se priznati, jerbo samo jeno slovo fali kak bi se zvala Kolosreće. E, to bi tek bila parodija i pizdarija jerbo tu sreće ni niti traga niti glasa, tu, v obraslom trsju vredi samo „ugođaj“ rada, reda i discipline, tlake i rabote. Razme se da to nam Stepanićem, teri korene vlečemu ze stare i plemenitaške turopolske loze, baš i nejde pod kapu i ni malo ne doprinosi naše radosti i sreće. Ruku na srce, jednostavno nismu nafčeni na te težačke, da ne velim kmetske aktivnosti i tretmane. Ali, čem smu tu „psihičku barijjeru“ uspeli nekak deti v drugi plan i ostaviti po strane, s'e je nekak bilo leže pak su i flakserice zagrmele svoju složnu, bučnu i agresivnu pesmu, narušavajuć idiličnu tišinu celoga brega, teru su samo tičice prekidale svojem jutarnjem pojem. Na leve strane brega je trsje z oko četristo trsekov dobroga, staroga direktora iliti tuduma, a na leve je velika, razme se, nepokošena livada (svaka sličnost z Dinkovum frizurum je slučajna). Čem spomenete breg, mam vam je jasno da tu caruju opcije „na breg“ i „pod breg“, pak i v jene i v druge furt morate biti „pod ručnum“ jerbo je s'aki krivi korak z žmefkum čižmum po mlade rose potencijalna opasnost da se strmopizdite – pod breg. Zato ta košnja iziskuje velike fizičke napore i stalnu koncentraciju i zato sem ju već uvodno krstil kak tlaku i rabotu. I zato nikak ni preporučljivo izlagati se povodljive i prevrtljive čudi jutarnje rakije jerbo bi i to moglo biti kobno po s'akoga kosca na te bregovite strmine. Sreća, za nekaj malo više od vuru i pol pokosili smu okoliš oko s'akoga trseka i celomu trsju vrnuli sliku brižno održavane vinogradarske parcele. Konačno smu, milošću gazde Ćirokija, stekli pravo na mali predah za stolom ispod veeelikooga staroga hrasta teri se pomalo punil z mladem i kitnastem zelenem lišćem. Razme se da mi je to i najlepši i najdrakši del i prizor cele te parade vezane vuz košnju trsja….Gazda si je fakat dal truda pak je svoje plemenite težake počastil z više fele domaćega špeka, sira, luka, kruva i peciva, a bogme, verovali ili ne, ni falelo niti dalmatinskoga pršuta. Čak smu beli stolnak teroga je prethodno prestrl uspeli počapati z slatkem sokom z onoga maloga „šeri“ paradajza. A vuz s'e to, konačno je z upotrebe hitil one male plastične čašićke, jedva su imale 0,02 i zamenil je z malemi steklenemi 0,05 kriglinčeki z tere si kak čovek mogel popiti rakijicu i ž'num se okrepiti i snagu kuliko-tuliko povrnuti. Gablec gozba ispod staroga hrasta bitno je doprinesla našemu oporavku tak da smu drugi del brega rešili za s'ega jenu vuru i priču priveli kraju. E, sad smu već ostvarili pravo i na gemištek, v terem se žutilo lajnsko vinčeko, naređeno z tudum grozdekov tere smu negde v druge polovice rujna brižno pobrali, vodeć brigu i računa o s'ake bobice tera se štela skriti v trave. E, nećeš razbojnice, ideš ti najprije v prešu, a potem i v lajtek. O tomu kuliko je gazda Ćiro na tu masu grozdov pobrane z četristo trsekov dodal cukora, ne bi štel polemizerati, još mejne o tomu jel je i kuliko dodal H2O-a…Neki su zlobniki uglavnom rekli da mu je taj dan hidrofor pregorel….kaj god….od čega bi pregorel!? Tak je, eto, prešla ta naša subotnja radna uvertira u nedjeljni neradni Praznik rada….

Popoldan je bilo rezerverano za tekmu protiv favoriziranog aspiranta za jedinstvenu III HNL, momčadi iz „betonskog“ zagrebačkog predgrađa Lučkog. Imal sam osećaj da budu naši dečki dali s'e od sebe, delom kak bi oprali sramotu i „šupanec“ z terem nas je v kupu počastila nižerazredna momčad z Rakovca. I tak je i bilo, naši su odigrali možda i najzrelije poluvreme v cele sezone, a dinamike z prve dvajst minut ne bi se posrameli ni pojedini prvoligaši. Na žalost, ogromnu količinu trke, truda i discipline nismo uspeli okruniti z najvažnijem dosegom – golom, a iz četiri, pet situacije to smo jednostavno morali. Na druge strane gosti su iz je'ne jedine, ne prilike, neg situacije, stvorili nepriliku za našu obranu i je'nu nisku loptu uspeli zavleči v Išekov levi kut, vuz samu stativu. Da ne veruješ i da poludiš! Veliki napori v drugom poluvremenu da barem poravnamu nisu urodili plodom, bez obzira kaj smu prihvatili više rizika v igre i na taj način i gostima omogućili da dojdeju do malo više zraka. Dečkima fakat nemamo kaj zameriti niti prigovoriti, ali niti tugu zbog tak nesretnoga i nepravičnoga ishoda ne mremo skriti, s'e više svesni realnosti i neumitnosti izreke – „kraljevstvo za strijelca“. Eto, tak smu se uverili da ni  vu tem velikem nogometnom radu naše dečkov na terenu, ponekad – ni spas, i to s'ega dan prije praznika toga istoga rada….

Ni ukusni Robijev i Filin roštilj, nit mrzli gemišti, a niti nekak pomalo prisilna i odsutna bela, nisu nas mogli utješiti niti sprati gorčinu posle tak nesretnoga poraza. Kaj više, gorčina nam je dodatno zrasla jerbo je, negde oko pol devet, usledila nova nesreća i to ona - na radu. Naime, naša je Zdenka, kak i navek posle tekme, nastojala čem prije pobrati svu ambalažu tera je ostala na terase i okoj'ne. Pod jenu i drugu ruku natiskala je osem flaš pive i tak si zarobila ruke, a onda se popiknula na onaj jeb… drveni podest teroga smu meknuli z birca i pomalo nepromišleno ostavili v ćošku terase. Razme se da je nezin pad bil neminovan, samo kaj to ni bil obični, neg onaj slobodni i žmefki pad ze zaroblenemi rukami i z nemogućnosti da se na ruke dočekaš. Razme se i da je tresak na drveni podest bil i teški i veliki i zvučni, o čemu su svedočile i Zdenkine suze usled doživlenoga šoka i pretplene boli. Sam Bog da se ni jena flaša ispod nje ni razbila, to bi već moglo imati tragični prizvuk, ovak to ostaje kak je'no dobro v celem tem zlu…Eto i Zdenke je'no naravoučenje: ni treba z poslom noreti i prevreden biti pak s'e mam i v isti čas pospraviti. Tak nam je, eto, i naša Polona dokazala da v prevelikem radu ni nužno i navek -.spas, a naročito to ni dan prije praznika toga  istoga rada.

Natučena rebra nisu Zdenke dozvolila pravilno dihajne, pak je s'ako malo, kad bi preveć zraka povlekla, zaskučala i zajojkala. Nismu ju smeli niti nasmejavati jerbo bi je s'aki smeh mam navlekel bolnu grimasu na lice. Ipak, kad smu nezinu baš pristiglu frendicu Ivanku pitali jel čula da je na Udarniku bil potres oko pol devet, aluderajuć, razme se, na Zdenkin slobodni i zvučni pad, ni naša ranjenica ni mogla skriti smeh zbog ove pomalo „neslane“ šale na nezin račun. S'e je dobro kad se dobro svrši, pak onda i smeju na kraju i te kak ima mesta…

Prvomajsko nedelno jutro bilo nam je i čudno i pusto jerbo bi, v ne tak davna vremena, terasa kluba na 1. maj bila puna naroda, spremnoga da strplivo i v dugom redu čeka svoju priliku za zdelicu graha. Ovo leto očito niš od toga, nit je graha nit je naroda, je'na lepa tradicija naprasno je i iz nepoznate razlogov prekinuta. Kak i zakaj nis mogel niti znal odgovoriti velikem broju ljudi teri su me tokom subote i nedele zvali i pitali jel se bu na Udarniku kuval i delil prvomajski bažul?! Pak su se čudili kak ja to ne znam, am je to navek „tvoj“ SDP organizeral….eto, jednostavno ne znam, a i bojim se, dragi moji pajdaši i pajdašice, da to više ni „moj“ SDP….S'e kaj je v moje moći je, v ime s'e vas, merodavnima i odgovornima postaviti naslovno pitajne: kam je nestal prvomajski grah?! Eto, pak sem se, štel ne štel, bil prisiljen doteknuti te vraže politike, čovek to jednostavno ne mre zbeći jerbo za politiku jednostavno vredi ona kak i negda za bombone „Kiki“ – „bilo kuda, politika svuda“!

Bežim pak ojd'ne i vraćam se ipak sunčane terase na prvomajsko nedelno jutro. Gospon Šokić je već nateknul prvoga jajnca na ražen, Senad ispratil svoje „ratnike“ na oporavak posle čerajne tekme, Zdenka je još navek disala „z naporom i z greškum“. Kadeti su dobili vršnjake z Ponikve 2:0, a juniori protiv drugoplasiranog protivnika odigrali bez golova. Još dan prije su „dvojke“ prstića nadigrale prvu postavu Bana Jelačića z 5:3, a „dvojke“ limača z 4:1 „potopile“ Vatrogasca. Jedna sasma normalna, „udarnički“ uobičajena i radna nedela tera ni po čemu ni odavala dojam Praznika rada….

I kaj  mi je drugo preostalo neg se veseliti jajncu teroga sem ze Šokićevoga ražnja prenesel domom na obiteljski stol, kak bi s'i skup, v prigode Ivaninog i Markovog rođendana, ipak malo slasneše i bogateše omastili, neki brk, a neki samo nepce…Radosne obiteljske trenutke i nedeljni „happy end“ zagorčal mi je Dinamo z jednako lošem rezultatom i igrum prezenteranum na pokislom starom stadionu v „ulice pjesnika“. Točku na „i“ toga čudnoga Praznika rada dela je žena z vešću, teru je prečitala negde na „face booku“, da je mrl „naš“ kokičar i kestenjar, naš „Kokica“ ili „Maradona“, dobri duh naše Gorice. A v prošlu me sredu nazval i pital jel bu na Alpasu mogel prodavati kokice, jel ima mesta za njega! Odgovoril sam mu da bu mogel i da za njega mesta ima s'e dok bu Alpasa i s'e dok bu živ!

I, eto, kaj ti je život: i veliki maskenbal i još veći ćušpajz s'ega i s'ečega, i to često v isto vreme…..