CRTICE IZ KURILOVEČKOG NOGOMETNOG ŽIVOTA

NIT' DRENEK NIT' MASLINOVA GRANČICA…...SAMO – TRNJE….

Cvetni kurilovečki nogometni vikend

NIT' DRENEK NIT' MASLINOVA GRANČICA…...SAMO – TRNJE….

Taj vikend navek radosno dočekujemu, naročito Cvetnicu, bez obzira kaj je ta nedela posvećena muke Gospodnje. Upraf zbog toga ona je navek bila i bu i posebna i uzvišena, to više kaj nam nosi radost proleća i šarenilo boje: negda one živopisno žute, z teremi su se špinčili venčići drenka tere smu na Cvetnicu nosili na blagoslov, a denes ove sto nijanse zeleno-maslinaste, z teremi se pak diče grančice pristigle z naše tople južne krajolikov. I bil bi to, zapraf, jeden čist lepi i ugodni vikend, bez obzira kaj se sunce igralo „skrivača“ med tmurnemi oblački, da se v celu priču v subotu popoldan ni uplelo i – Trnje…

Baš me ta Cvetnica navek otpela v dane najranešega detinjstva pak mi se rado vraćaju prelepe i drage slike: dvorišća na staromu gruntu obrasloga v gustu zelenu travu, prešaranu z veselemi glavicami bele tratinčice i žute maslačkov, vrta teroga su celoga napale i preplavile drobne ljubičice i obale naše Lomice okupane v visibabami, šafrani i jaglaci dole, a cica-macami gore med krošnami vrbe. I vrčak je već bil prepun te šarolike vesnikov proleća, a v kutu se šepuril prekrasni grm žutoga drenka. Nigdar se nis mogel zdočkati trenutka kad bu mama napokon odrezala par grančice z toga grma kak bi splela venčić teroga bumo zutra nosili k meše, na blagoslov. Prelepi venčić bogat z drobnemi žutemi cvetići, med teremi se navek skrival i teri špičasti trn, tak je bil najspodobneši k onomu venčiću kakvoga je, v svoje velike patnje, na glave nosil Isusek. Zato je taj venčić, upraf za blagdan Cvetnice, postal i zaštitini znak celoga Turopolja pak ni bilo čoveka teri na nedelnu mešu ni donesel svoj žuti venčić i špinčil se ž'nem. Celo dvorišće cirkve bilo je okupano vu te žute venčiće…

Upraf su te drage i lepe uspomene bile razlog da v čošku našega novoga grunta i dvorišća strplivo i ponosno raste grm drenka. Doduše, ovo je leto nekak prerano ocval pak su lepe žute latice postale žrtve vetra teri je gusto puhal, a grančice se preslekle v zeleni kolorit gustoga lišća. Subota je osvanula prilično sunčana i pritajeno topla pak sem ze svojum femili jutarnju kavicu i rakijicu ispijal vane na dvorišću. Licu su pasale i godile tople zrake sunca, a oku, baš kak negda v detinjstvu, more tratinčice i maslačkov na mlade zelene travice. Mam smu donesli odluku da travu denes ne bumo kosili kak bi ti silni cvetići još mogli rasti i uživati na suncu. Zato me srdilo kad bi se Don i Benny valjali po te proletne cvetne idile, još više kad bi se, v one svoje ukopane i specifično mirne poze, „stovarili“ baš vu tem carstvu cveća…

Zato sem, iz čistoga protesta pobegel z doma i zaputil se na našu gradsku tržnicu iliti na plac. Drago  mi je kad me Slavica na svojem štandu dočka z osmehom i lepemi rečenicami, a puno mejne drago kad me za te dve,tri vrećice sačkove zelenjave „oplete“ za dvesto kunice. Ali, kaj češ, s'e je k vragu fest poskupelo pak ni ta zelenjava, teru doma svi rado konzumeramu, ne bu iznimka. Delam krug po Gorice i guštam v pošišane travice, v vređenemi cvetnaki, v granami punemi šare pisanice i v parku nakinđanem z onemi veeeliiikeeemi pisanicami. Drago mi je i kaj je naša župna cirkva bila premala prijeti sav svet pod svoj sveti svod pak je i dvorišće oko cirkve puno vernikov. Baš lepo…. K Rojcu sem se navrnul više radi navike, tradicije i reda, neg kaj sem očekival da bum nekaj eksrta pametno čul. Plus toga žurilo mi se na Udarnik de su naši klinci imali svoje tekme, a rado hitim oko na tu dečurliju da vidim do kud su segli v svoje nogometne naobrazbe i odrastajnu. Mnoštvo roditelja guštalo je v još navek toplom vremenu, mamice v jutarnje kavice, a tateki – kak teri, Bogu fala, za Zdenku i Ninu pune tace posla. Upal sem baš v skupinu roditelja de je za stolom tata Slaven vodil glavnu reč i malo šire otprl svoj šarajtuš. S'e redom je (po)častil pak je i naš stol za čas bil pun medice i travarice, a skužil sem brže i, još navek, na vreme da dober del te počašćene muškardinov zapravo „klin z klinom izbija“, jerbo su i snoćka do kesno na terase drvarili Elliot Nes(tić), Terza i društvo. Beži, Vladek, dok ti je vreme…Za to vreme već su i pioniri odigrali svoje tekme: mlađi su tesno zgubili od vršnjakov z Ilovca (1:2), ali su zato stareši bili okrutni i dobili z 8:0. Na umetne trave prstići su z 2:0, a limači z 4:1 nadigrali klince ze Zeline, na svoju i roditelsku veliku radost. Sreću im je pomutilo čudno i prevrtlivo vreme jerbo je sunca v hipu nestalo, a veter i kiša bili su razlog zbog teroga su se i klinci i roditelji povlekli v birc ili stisnuli v ćošku terase na terem ni tuliko puhalo. Eto ti čudne predigre za zutrašnu želno iščekivanu Cvetnicu…

Doma sem se uspel tek malo oporaviti z porcijum testenine utočane v vrjnu i parmezanu i gas natrag na Udarnik. Senad me nazval i obradoval z vešću da je naš tehniko Depa virozen pak bum mesto nega, kak rezervni predstavnik kluba, moral sesti na klupu. Ni me z tem baš preterano obradoval, ali, Bože moj, kaj se mora ni niti teško…Tak sem imal privilegiju tekmu z Trnjem gledeti z naše klupe, na tere sem se, oblečen v zimsku vetrovku (dokle?), barem mogel skriti od uporne i dosadne kišice. Već su prve minute potvrdile da bu tekma ponudila veliko taktičko nadmudrivanje mladih stručnjaka Harambašića i Pranjića, teri su si očito dali puno truda i rendgenski snimili s'aki svojega suparnika. Trnje se parkeralo na svoje polovice kak bi nas namamilo čem bliže i tak si otprlo situacije za moguće kontra udare. Sreća da je mladi Knežić rano zabil gajbu za naših 1:0 pak smu zbegli situaciju daljnjega beskonačnoga kruženja oko zgusnute Trnjanov, a nje v isto vreme natirali da kreneju prem napred i otpreju se. I s'e je to čist dobro zgledalo jerbo smu bili strplivi i uporni, bez posebne i velike gostujuće ugroze spram Išeka. Kobna je, na žalost, bila 44. minuta kad smu već, očito prerano, razmišljali o odlasku na poluvreme. Glavni sudec ni sviral, a niti je pomoćni mahnul, iz samo njem znane razlogov, čistu ruku gostujućega igrača, od čije se lopta odbila u for gostima pa je podremana reakcija naše  zadnje linije završila z loptum v male mrežice, iza leđa uzalud ispruženoga i već spomenutoga Išeka. I drugo je poluvreme nastavleno v istom ili sličnom ritmu, z tem da su se gosti nekak više zgusnuli na sredine i češće družili z loptum. Imali su pri tem i zicera za vodstvo, ali nisu bili precizni, baš kak to v dva navrata nisu bili ni naši Tolj i Selman. S'e više je mirisalo na nerešeno, ali mi smu bili ti koje je strplenje prve i v zao čas izdalo. Radošev, z klupe se činilo bespotrebni klizeći start, završava obaranjem gostujućeg napadača i opravdanem elverom. Sudec mu pri tem ne dodjeljuje žuti karton, kaj je po Bogu i pravice moral napraviti, dokazujuć tak da zbog nesvirane ruke na isteku prvoga polčasa, ipak „ima putra na glave“. Kak jedno zlo nigdar ne dolazi samo, tak je i v ove situacije Išek obranil penal, na kaj naša obrana očito ni bila spremna pak na odbijenu loptu prvi stiže igrač Trnja i vuz još jenu Išekovu intervenciju loptu ipak posprema v mrežu. Da ne veruješ, da poludiš…..šok za šokom….i povratka više ni bilo, bodovi bespovratno otputovaše via Trnje koje nam je na isti način uzvratilo za svoj jesenski domaći poraz. Šteta….no, celi taj razvoj događanja i ponašanja na terenu zapraf je potvrda činjenice da je pred Senadom još puno, puno posla kak bi pojedince uveril da moraju još puno i strplivo delati i puno žgancov pojesti da bi postali pravi igrači, kakvima se oni već sad, pomalo samoljubivo i očito preuranjeno – smatraju.

Sav smisao i poanta nogometa i sporta uopće, viđen je posle tekme, v klupske društvene sale i bircu. Tam su si, naime, skupa seli igrači jedne i druge momčadi, počastili se z pizzami i soki, do nje su za zajedničkim stolom v živem razgovoru i razmene iskustva guštali treneri Harambašić i Pranjić, vuz patronat „nogo-oldtimera“ Pavkovića. Za drugem stolom su se pak častili i divanili precedniki oba dva kluba, razme se, različitoga raspoloženja…Ta slika ostaje i ona je najveća i zajednička pobeda s'e akterov ove, inače, vrlo dobre, taktički zahtjevne i kvalitetne utakmice. Drago mi je da su se vu lepotu i širinu te slike mogli uveriti i gospon Saša, naš dragi pajdaš z Lukavca i gospon Dražen, naš ex-gradonačelnik koji su nas počastili dolaskom na tekmu i dugim šank boravkom v našem centralnom birc prostoru.

Na žalost, med zaslužne aktere ove tekme nemam namjeru ubrojiti glavnog suca i to ne zbog ne znam kakve velike pogreške ili previda (iak' je i toga bilo), već prije s'ega zbog neprimjerene i osorne izjave („…to nikad neće biti ruka!“), a nadasve zbog zlouporabe položaja suca, v koje na površinu očito prečesto isplivaju njihovi određeni kompleksi i potrebe za egocentrizmom. A tak bi bilo lepo kad bi napokon svatili, da su, bez obzira na sudačke moći z teremi raspolažeju i moreju mahati po svojoj vole, na kraju i oni ipak – samo obični ljudi. A još bi bilo lepše kad bi se tak, kak obični i dobronamerni ljudi, ponašali i na terenu…..

Eto, domaći poraz kontra Trnja ostavil je traga i na samu Cvetnicu, pak nam ni bila ni tak cvetna ni topla, iak' se sunce pak sramežlivo pokazalo. I ni jutro bilo Bog zna kuliko pametneše od večeri, naročito za Senada teri je dober del noći potrošil kak bi pogledal tekmu budućega protivnika – HAŠK-a. Igrači su već vane trenerali kak bi se rekupererali i oporavili od čeranjega šoka, a klinci su igrali svoje tekme. Samoborci su bili bolji od naše oba dve „druge“ postave pionirov, a na „umetne“ su Bunci zmagali naše druge postave prstićov i limačov. Tek je „treći saziv“ prstićov uspel pobediti klince z Lomice i to z fest bogatem rezultatom 6:5. Kadeti su v Sisku zvlekli bod kontra Segeste, dok su juniori „stare dame“ bili rezultatski tesno bolji od naše – 2:1.

Nis, naravno, pozabil ni na belu, to više kaj se igrala celi tjeden. Slavodobitnici tjedna su Senad i Miki teri su z čiste 5:0 sprašili Ćiru i precednika, onda pak mene i precednika, a završno v petek i mene i Ninu, nakon kaj smu vodili z 4:0, z neverovatne 4:5. Tu je večer z četri dečke otprl Premec za susednem roditelskem stolom, a zaprl Senad, z takaj četri dečke, taman kad smu Nina i ja trebali van zajti. Bem ti takvu sreću….iak znam da su Senadu s'e te silne bela pobede slaba utjeha posle hoda po mukami (čitaj: Trnju). Utjehe ni bilo niti za veterane teri su se taj petek konačno skupili, ali i na knap zgubili tekmu kontra VG boysov 0:1. Dugo su posle tekme ostali v klubu na spominke i druženju (piva se podrazumeva), pak se bu valda z te silne spominkov i dokončkov nekaj pametnoga zrodilo i dogodilo.

Ja sem utjehu, na tu dragu Cvetnicu, poiskal i našel, de drugde neg doma, v roštilju z teroga se na dvorišću već fest kadelo. Po časku, dok smu popili po dve Mikijeve friško pristigle slavonske šlivovice, već je tak dišalo da se nis mogel dočkati seobe za stol. Za s'e svoje frustracije toga vikenda, odlučil sem ovetu poiskati baš v – roštilju. I moram vam priznati da sem ze sem uspel, iak to ni bila slatka, neg luta osveta. Razme se, zbog mladoga luka…..Ajd, bok!