Vladimir Stepanic.jpg

CRTICE IZ KURILOVEČKOG NOGOMETNOG ŽIVOTA

Tekst piše: Vladimir Stepanić

SVETI MARTIN JE, IPAK, NAŠ PAJDAŠ…

Naslovni se zaključak nameće sam po sebe, prije s'ega iz razloga kaj smu v martinjskem vikendu, točnije v subotu, relativno lefko došli do prekokrasne i uverlive pobede kontra gostov ze zagrebačkoga Stenjevca, Ponikve. Pobeda nam je posle tragičnoga „ženskoga“ poraza v Samoboru, bila i te kak i preko potrebna i fakat nam je došla kak kec na desetaču.

 

Da bu sveti Martin toga dana ipak drukal za nas, dalo se naslutiti mam od prve minute jerbo je baš v prve minute Crnov lepem i odmerenem udarcem, malo skosa, poenteral za 1:0. Normalno da nam je odma opal kamen ze srca i leže se disalo, bez obzira na primisli i bojazan da to naše vodstvo ipak ni došlo malo prerano. Ali, kad je već v 17. minute omaleni Alili glavom pospravil i drugu loptu v gostujuću mrežu, mrske primisli su otišle v – treći plan. Vuz to, i solidna igra naše momčadi dala nam je zapraf nadati se kak ova tekma ide v jednom smeru. Na poluvreme se otišlo z lepe i čiste 2:0, a protivnik nam, bez obzira na momente naglašene živosti, ipak ni dal razloga za veću zabrinutost.

Ipak sem se, vuz vrući čaj na poluvremenu, na moment setil „papagajske“ rečenice negdašnjega našega trenera Vlade Benšaka Serge: „Dečki, 2:0 je najgori rezultat…“. Razme se, pri tem je navek aluderal kak takov rezultat nikak ne nudi razlog za bilo kakvo opuštajne jerbo ak ti ga protivnik zabije i smanji na 2:1, on se diže z mrtve i nikad ne znaš kak bu to završilo…..Srećom, Sergin je papagaj odlepršal v nepoznate i neslućene visine već na otvarajnu drugoga polčasa, kad je Ćosić v 48. minute završil jednu našu dužu akciju i z neposredne blizine loptu prizemno pospravil v stenjevečku mrežu. Tekma je posle toga otišla v relativni smiraj, a gosti su bili prisiljeni još jemput „zastenjati“ i to v 71. minute kad je svoju dobru igru Aleks okrunil golom, opet z blizine i opet prizemno, po majčice zemle. Za te niske lopte gostujući visoki golman Orlović ni imal leka, daleko više su mu pasale one poluvisoke i visoke tere su mu dale priliku da pokaže i dokaže svoje orlovske vrednote u duhu prezimena. Gosti su se ipak stigli i malo utešiti počasnem golom v 78. minute, pri čemu je Plehan skinul paučinu baš tam de se spajaju plehnata prečka i isto takva stativa.

I kaj nam je posle toga preostalo neg da se počastimu z kupicum Kolarićevoga silvanca, teri je već pozabil kad je bil mali i kad su ga moštekom zvali. Razme se da smu si hitili i teru partiju bele (dobro, kad vas već zanima, Miki i ja smu dobili precednika i Ćirokija), dok su igrači v sale vuz „pizza-party“, hidru i nekteri heineken proslavili solidnu i sigurnu igru tera je donesla i uverlivu pobedu, pa im na iste i v ove prigode iskreno čestitam.

Žal mi je bilo kaj sem moral napustiti taj veseli kurilovečki pajdaški skup, ali čekal me je još jeden vekšega volumena i važnosti, a to je tradicionalno druženje goričke martinjske pajdašov v Pivnice ili kak se negda reklo – v Menze. Po sredi je druženje tero, verovali ili ne, traje od davnoga 1966.-oga leta, samo ga je korona zadnje dve lete uspela sjeb…..Kak se korona Bogu fala ipak i komaj jedva povlekla, to nam je dala za praf da se nas šezdesetak v subotu pak okupi kak bi si odigrali turnir v šnapsu, mošteka pokrstili v vino, dobro si i obilno pojeli i još obilneše popili. I fakat je bilo lepo pak na jenom mestu i s'e skupa videti s'e te drage pajdaše, od one stare veteranov Brace Rojca, Damira Šafara, Štefa Kosa, Pere Pilepica, Iveka Mikulčića, Mikija Kučiša….brojne pajdašov moje i sredne dobi, a nadasve one najmlajše teri s'ako leto podmlađuju pajdašiju, pak su i ovo leto v naše pajdaško jato zleteli četiri mladi i novi ftiči. Rakijica dobrodošlice, kuruzni kruvek i domaći sir bili su uvertira i predigra turniru na terem je po četri put pobedil Branko Fabijančić i postal apsolutni kralj šnapsa. Ruku na srce, već nam ide pomalo na živce z temi svojemi pobedami….Onda je na red došla bogata večera po izboru domaćina, braće Čunčić, pri čem su, kak se i šika, prigodno, v glavne uloge bili buncek, dinstano zelje, pečeni krumper na pole i zapečeni bažul, z dozum hrena po vlastitom izboru. Red je posle toga bil i sprazniti nove kupice gemišta i zapopevati „rašpu“, tradicionalnu popevku goričke pajdašov, a s'e to nakon kaj smu mnutum šutnje odali počasti sem pajdašom teri više nisu z nami. Taman kad je vura otukla pol noći, v Pivnicu su se v lelujave prošecije došpancerali presvetli biškup Miki i negvi vinski kardinali, a strplivo ih je pratil mali dečec z škrabicum v teru je s'aki pajdaš del nekteru kunu, većinum papernatu. Ritual krštejna zločestoga, svadlivoga i poškodnoga mošta v drago i milo vinčeko, zafaljujuć biškupovom smislu za šalu, obično preraste v komediju i pišuriju tera vas mora nasmejati do suze, pak je tak bilo i v ove prigode. Jedino biškupovom sinu, legendarnom pajdašu Soksu kak da ni bilo do smeha, ne znam ki mu je vrag bil, nekak mi je zgledal muten i umoren…Na kraju rituala kralj je konačno proglašen i krunisan za kralja, a na glave mu se nagnezdila prava pravcata kruna, z terum se šepuril po cele sale, a drage podanike i pajdaše počastil z 10 litri tek pokrštenoga vina. Završni čin cele martinjske pajdašije je bil premni ispit za 4 nova i mlajša potencijalna pajdaša teri su isti – eksajne pol litre (negda i sedem deci) gemišta z one zajebane posude tera se zove trilikum – položili bez ikakvoga problema, a kamo li napora. Čestitam, dečki, dobrodošli v raj goričke martinjske pajdašije…..

Prije neg sem, oko jene vure, donesel odluku da bi bilo vreme domeku svemu pojti, još sem si popil laganoga putnoga gemišteka, ali kaj je puno važneše i pojel fajn onoga domaćega sireka i kuruznoga kruveka. Već za deset minut mi je bilo jasno da su taj sir i kruvek bili bogomdani i sudbinski potez jerbo me, čem sem skrenul v Medarićevu vulicu, zguza popratilo svetlo rotirke od tere si zaziremu vu te martinjske dane, a naročito noći. Mladi i prijazni policijski delatnik mi je lubazno ponudil ampulu za puhajne, teru nis mogel ni pod razno odbiti, neg sem se po negvom naputku prijel puhajna tero bi trebalo trajati sedem sekundi. „Gospodine, rezultat je 0,45, hvala vam i laku noć“ – bile su završne reči dečeca v plave uniforme, tere su me obradovale i razgalile, kak se veli, do jajec. Sreća vu te moje nesreće je bila kaj sem se vezal čem sem sel za volan, kaj mi baš, moram priznati i ni nekakva sveta navada, a najvekša olakotna okotnost zapraf su bili oni putni zalogaji sireka i kruveka teri su očito sprečili hudu maligansku skalu da prejde prek 0,5 promilov. Lepi moj sirek i dragi kruvek….na vami sem odrasel pak je bil i red da mi malo vrnete milo za drago, kaj vam nem zabil taj prvi čas…..Fala i tebe, sveti Martin, ipak si ti i moj pajdaš….

De ćeš lepšega i vekšega razloga da se v jutro zbudiš i zdigneš z osmehom i veselo čekaš ženinu kavicu i sinovu rakijicu. Normalno da su me braća za stolom mam dočekala z pitajnem kak je snoćka bilo na pajdašije, a ja sem jem s'e podrobno opisal i dopovedal. Još sem dodal da bi to bila jena od lepše pajdašije da me na putu do doma ni policija stavila i „zroterala“. S'i za stolom su mam zdigli glave i v isti glas me znatiželno i zgroženo i onak k'o z topa priupitali: „I kuliko si napuhal?“ Z posebnem i pomalko ekstazičnem nadahnućem sem jem dal odgovor: „0,45, evo vam roge! Kaj ste mislili da se stari nalokal i ostal bez dozvole?! Malo morgen!!!“ Njihovo zgražanje i neverica sad su bili još vekši, samo v kontra, pozitivnom i radosnom smeru, pak mi je Marko za nagradu natočil još jenu rakijicu….Ajd, živeli vi meni!!!