CRTICE IZ KURILOVEČKOG NOGOMETNOG ŽIVOTA

​

 

Još jedna sezona je, glede službenoga i natjecateljskoga loptajna, završila – game over. I dok se svi “normalni” klubovi spremaju ili su već otišli na nogo-počinek i odmor, pri nami je situacija sasma suprotna, počinek još nikomu ni niti v – primisli. Zapraf, pri nami tek sad počinje, kak bi to otpopeval mali od Nižetića - “ludilo, brale”. Ludilo je već i te kak zelo maha pak ste se uverili da niti ja baš više nimam čas baš s'aki pondelek  v uredovno vreme poslati vam svoje pisane misli i primisli glede tjedna iza nas....

 

Običaj je jednostavno takof pak se posle s'ake sezone delaju analize i rezimeraju ostvareni sportski rezultati i postignuta ina dostignuća. Mi čak ni zato baš nimamu preveć cajta pak ta obaveza tek čeka nadležne klupske stručne i upravljačke strukture tere tradicionalno morjau “podnesti svoj račun”. Zato bum je probal, onak brzopotezno, hititi na paper jeden mali rezime “s'ega i sečega”, razme se, ze svojega kuta.

 

SENIORI

Još tam negde prije Vuzma smu se malo rezultatski i bodovno posmeknuli i opali na “začarano” 13. mesto i ž'nega se bogme nismu pomeknuli, ni gore ni dole, ni posle zajdnega, 34. kola. Opstanak v lige smu “zacementerali” još prije pet, šest kola, pak smu, verovatno zafaljujuć baš te spoznaje, zadnje tekme odigrali bez prevelike tenzije, a nektere med n'emi i bez potrebne doze žara i karaktera.

Kad se vrnem leto dan natrag i setim popisa igrača za novu sezonu na terem je bilo 5 imena, a pred s'emi nami “muke Isusove” na putu stvaranja nove momčadi, onda se konačni rezultat jednostavno nemre oceniti nikak drugač neg uspešnim, čak bi rekel i iznad očekivajna. Naš “Bosanec” je skup ze svojemi suradniki ze struke (Dinko, Depa, Pero, Žugi, Bradić...) naredil malo čudo od momčadi tera se skupila ze s'e stran sveta i tera se nigdar ni skupa videla ili zestala niti v disco klubu, kam pak na terenu. Upraf zato smu cele lige v proleće bili velika nepoznanica pak smu neke favorite “vlovili na spajnu” i zafaljujć tomu naredili solidnu jesensku berbu i čist lepu zalihu bodova. I sam Bog da jesmu....

Na proleće su već s'em bile poznate naše vrline i mane, dobre i mejne dobre strane, a na površinu je splivala i naša “prevrtliva ćud” pak smu kontra favoritof odigrali niz dobre tekme z mršavem bodovnem učinkom, a kontra “one male” dobili “po tambure”. I tu zapraf niti velike niti posebne mudrosti jednostavno ni: relativno igrački kvaliteni pojedinci ipak nisu prerasli v mpmčad čiji zajednički nazivnik mora biti – momčadski duh i karakter. Da smu baš z karakternemi zalihami “na rezerve” potvrdila su posrtanja v kupu pak su nas v županijskem van hitili turbo amateri z nižerazrednoga Rakovca (sramota, kaj drugo!?), a v gradskem “bani” z vukovinskoga Jelačića. A sega par lete predi toga smu četri put za redom osvajali županiju, zamazali dva put  “veliku” Črnkovu Goricu...

E, s'e je to razlog da zadovoljstvu, a kam pak blaženomu miru v našemi redmi još navek mesta – ni. Struka obavlja spominke z igrači teri bi morali dati odgovor na pitajne oko buduće želje i namere, a nadasve oko podudarnosti ili bliskosti ambicije i ciljeva pojedinca, momčadi i kluba. Razme se da ni tajna da su v planu i spominki z igračima teri bi trebali donesti novu dodanu vrednost i momčadi i klubu. Uglavnom, za Senada & Co. brige i posla prek glave....

 

ŠKOLA – MLADEŽ

Naša školica i dale ostaje naš ponos i naša dika i naša slika v tere još navek domineraju lepe, svetle i ružičaste boje. Jako puno drage dečice razvrstane v čak dvanajst kategorije tere se redovito loptaju i nadmeću z vršnaki z čak četri susedne županije, pri čemu je priličen broj naše klincov na raspolagajnu susednemi klubovima teri kubure z dečicum v pojedinemi kategorijami. Jako puno i drage, razumne, dobronamerne i realne roditelov bez tere skoro s'akodnevna “nastava” v škole jednostavno ne bi bila moguća. Jako puno strplenja i ozbiljnosti, truda i odricanja s'e trenerov v škole, bez obzira kaj prostora i vremena za bolje i više navek – ima. I na kraju, jako puno dobre rezultatov, ma kuliko se mi kleli kak “negva visost rezultat” ni baš najvažneji kad su klinci vu pitajnu. Nikad mejne brige i strepnje oko rezulatatov i plasmana juniorov i kadetov nismu imali neg ove sezone. Pioniri su i vu tem višem rangu dokazali da su se više neg opravdano lani pomeknuli vu'jnega. Pa v nedelu je bila milina gledeti mlađe kakvu su igru prikazali kontra Karlovca i napunili mu mrežu do vrha. Klinci z “maloga” Kurilovca jednostavno su nadigrali i “posrameli” vršnjake z “velikoga” Karlovca. I stareši bi odigrali sasvim drugu ariju i pesmu da nisu bili oslabljeni za tri, četri “krizmanike”. Ne mari, i cirkve je red dati kaj je pripada....Logično je da su “dvojke” pionirov imale dosta problema v visokem županijskem rangu, baš kak se to znalo dogoditi “dvojkami” i ”trojkami” limačov i prstićov. Ali, istinsku pobedu predstavlja činjenica da su s'a deca, ali baš s'a, s'aki vikend igrala svoju tekmu, imali svoje nastupe, veselili se pobede i očajnički tugovali kad se iste nisu domogli. To je, zapraf, smisel I poanta cele te priče oko škole nogometa i oko dece tera redovito, tri ili četri put skupa treneraju, igraju se i druže na zelene travice (makar i umetne) i friškem zraku.

Ali, niti tu pesme ni kraj iak' je sezona završila. V punem su tijeku pripreme za odlazak na turnir v Crikvenicu (vikend 10-12.06.), a na put ide više od 140 klincov, razme se, zafaljujuć pak razumevanju i “široke ruke” roditelov. Inače, treningi v škole traju s'e do kraja lipnja, a u međuvremenu je v sredu 15.06. na rasporedu i Dan roditelja za teroga sem već sad uvreren kak bu prerasel v dan za pamćenje. E, onda nam još budu mameki i tateki morali malo pomoći oko organizacije “Alpas cupa”, na terem s'aki dan moramu prirediti 250 ručkov za limače od Metkovića do Munchena. A posle derneka na Ilićevom koncertu, nek lepo skup z klincima idu – v rit, kaj god, šalim se, naravno, nek idu kam ih noge nose i srce vleče, nek se kupaju i sunčaju, nek s'i skup uživaju do  mile vole...i tak se do 01. kolovoza....a onad s'e pak iznova i po starom....Lepi, dugi i ugodni odmor od srca želim s'e naše klinčadije i celem našem roditeljskom pučanstvu....

 

DOBRO DOŠLI “UDARNIČKI” DANI...

Also bite, “ludilo, brale” neposredno je pred nami. Odigrane su kvalifikacije za glavni turnir, pri čemu ni dosadna kišica v prigode Dana državnosti ni bila baš nikakva zapreka za klince, više za ljude v klubu teri vode brigu o pripreme terena za Alpas. Klinci ze Zeline, Sesvetskoga Kraljevca i Buzina domogli su se ulaznice za glavni turnir na terem ih čekaju vršnjaki z još 37 klubova z Hrvatske i 8 evropske zemlice. S'e tehničke, protokolarne, službene i pravne obaveze vezane vuz turnir uspešno su apsolverane, ostaje tek ušminkati terene i okoliš, dekorerati terasu i – igre moreju početi. Ne sumnjam ni trena da budu s'e upravljačke, djelatne, trenerske, igračke i veteranske strukture kluba dale s'e od sebe kak bi se s'i skupa za teri dan mogli spominati o još jednem nezaboravnem Alpas cupu na kurilovečki način. I ovu prigodu koristim da ih s'e pozovem na kup, da puni vole, složno i združeno pokažemu i dokažemu kaj s'e kurilovečke ruke i kurilovečko srce moreju narediti!!!

E, onda kad v nedelu na večer i v pondelek rano v jutro decu ispratimu prama Verone, Sofije, Budimpešte, Munchenu, Ljubljane, Sarajevu, Beogradu....Metkoviću, Zadru, Splitu....i kaj ti ja znam kam s'e ne, onda se lepo s'i skup okrećemu prama koncertu v tork na večer.

Ne sumnjam da bu narodnjački doajen Miroslav Ilić skupa z grupum Sjaj privlekel veliki broj nostalgične sredne i stareše, ali isto tak i mlajše generacije sklone dobromu tulumu i derneku. I pak bumo morali zapeti, kak se veli z petne žil kak bi s'e to lepo organizerali, s'e goste lepo dočkali, smestili, podvorili i po mogućnosti napili, ali i v redu i miru domom otpratili. I verujem da bu s'emu tomu baš tak i da posle toga nigdo od nas sretneši i zadovolneši ne bu...Mi teri volimu zaružiti zbog dobroga štimunga i derneka za pamćenje, a škrti precednik zbog.....znate već zbog čega....money, money, money....

Podari nam, dragi Bože, vu te s'e “udarničke” denke i noćica lepoga vremena, dej nam snage i strplenja da s’e zbavimu i zduramu kak se to šika i od nas očekuje...pak buš videl da baš nikomu ne bu žal, čak niti Tebe kaj si bil z nami i vuz nas. I s'i bumu sretni i veseli i Tebe zahvalni....baš kak da smu v raju....Amen za denes, ajd bok i živeli s'i vi mene v sreće i ljubavi vu s'e denke života svega!!!